LAOAG CITY – Impasigurado ti National Food Authority (NFA) nga adda umdas a buffer stock ti pagilian iti bagas para iti panawen ti panagtutudo.
Iti Bagong Pilipinas Ngayon, kinuna ni National Food Authority Acting Administrator Larry Lacson a nakagatangda iti ad-adu pay a bagas manipud kadagiti mannalon ken nagun-odda ti target a buffer stock.
Kinunana a nasayaat itan ti buffer stock ti National Food Authority, isu a nakasagana ti ahensia para iti masakbayan, nangruna ita a panawen ti panagtutudo.
Segun ken ni Lacson, ar-aramidenda itan ti panaggiling ken nakasaganadan para iti panawen ti panag-apit para iti wet season.
Gapu iti daytoy, innayon ni Lacson nga awan ti pakadanagan ti publiko gapu ta uray agtudo ken bagyo ket umdasen ti buffer stock para iti kasapulan ti publiko.
