LAOAG CITY – Naidumduma ti pagalagadan a maipatpatungpal idiay Bulgaria ita a panawen ti krisis gapo iti COVID-19 pandemic.
Segun kenni Bombo International News Correspondent Jenny Nikolova idiay Bulgaria, mapalubusan dagiti nagannak a rumwar iti pagtaengan da ngem masapol nga adda ti kadwa na nga anak nga agtawen ti 12 agpababa.
Inbatad na a gapo iti daytoy ket nagprotesta dagiti dadduma a residente kangrunaan na dagiti agtawen ti 12 agpangato no apay a saan da a mabalin a rumwar a kas kadagiti ub-ubing ngem kadakuada.
Mainaig iti daytoy, apaman a maisursurat ti damag ket awan ti baro a kaso ti virus iti nasao a pagilyan ken naglukat metten ti maysa a parke ngem nagtalinaed a nakaserra dagiti pagadalan.
Kunana nga awan ti Pilipino nga apektado iti sakit ngem dagiti Bulgarian ket napukawan ti trabaho ken awan ti maaw-awat da nga cash assistance ken relief goods.
