LAOAG CITY – Nangipakita ti pannakaalarma ti maysa a grupo ti meat importers iti pagilian gapu iti bumasbassit a suplay ti karne ti baboy ita manipod iti ballasiw-taaw.
Daytoy ket iti baet ti mapaspasaran a limitado a suplay ti karne a baboy manipod iti ballasiw-taaw gapu iti epekto ti African Swine Fever.
Malaksid iti daytoy, nangipakita pay ti pannakaalarma dagiti sumagmamano a grupo dagiti agtartaraken ti baboy iti inpatungpal a suspensyon ti Department of Agriculture iti minimum access volume wenno tariff quota para iti baboy.
Iti babaen daytoy ket mapalubusan dagiti meat importer a makinegosio iti nababbaba a rate ti taripa.
Gapu iti daytoy, nagpanawagan dagitoy ken ni Presidente Ferdinand Marcos Jr. kagiddan ti panangirekomendar dagiti sumagmamano a measers iti Economic Managers ti administrasion a labanan ti inflation karamanen ti pannakaiyalud-od pay ti nababbaba a taripa iti karne ti baboy idinto a maipalpalawa met ti minimum access volume para iti karne ti baboy ken manok.
Kabayatanna, basar iti kaudian a datos nga inruar ti Bureau of Animal Industry ket rumrummuar nga adda ti pakabuklan a 273.6 million kilograms dagiti karne ti baboy a simrek ditoy pagilian iti umuna a tallo a bulan iti tawen 2024.
Nangatngato daytoy ti 3.1% manipod iti 265.5 million kilograms a nairekord iti kapada a panawen iti napalabas a tawen.
