LAOAG CITY – Inpakaammo ni F/Supt. Roxanne Parado, Provincial Fire Marshal ti Bureau of Fire Protection ditoy Ilocos Norte nga agkurkurang ti bumbero ditoy probinsia.
Segun kenkuana, masapul nga adda ti 14 a personnel iti kada fire truck a mapan agresponde kadagiti mapaspasamak nga uram.
Nupay kasta, inlawlawagna a gapu iti kinakurang ti bilang dagiti bumbero kadagiti nagduduma a fire station ditoy probinsia ket kagudua laeng iti naikeddeng a bilang dagiti bumbero ti mapan agresponde kadagiti insidente.
Gapu iti daytoy, kalikagum ni F/Supt. Parado a manayonan dagiti bumbero ditoy probinsia iti kabiitan a panawen tapno ad-adu ken al-alisto dagitoy a makapagresponde kadagiti uram.
Innayonna nga iti agdama ket adda ti sumurok 400 laeng a personnel ti Bureau of Fire Protection iti intero a probinsia.
