LAOAG CITY – Maysa a bumbilya ti sumurok 100 a tawenen a nakapasged iti agtultuloy a mangipaay ti raniag iti Fire Station #6 ti Livermore-Pleasanton Fire Department.
Am-ammo kas Livermore Centennial Light Bulb, daytoy ti kabayagan a nakapasged a bumbilya iti intero a lubong sipod pay idi 1901.
Iti agdama, nakapsoten no sadinno ket 4-watt laengen ti raniagna daytoy.
Orihinal daytoy a 60-watt carbon-filament bulb a naaramid iti Shelby Electric Company ken dinisenio ti French scientist a ni Adolphe Chaillet.
Segun iti mangimatmaton, nagpaot daytoy gapu ta manmano laeng nga iddepen, naaramid daytoy iti natibker a materyales ken nakakonektar ita iti maysa nga emergency power supply.
Idi naiyakar daytoy idi 1976, naaddaan pay ti firetruck escort tapno maipasigurado a saan daytoy a maperdi.
Idi 2013, kellaat daytoy a nagiddep ngem naduktalan a naputed laeng ti kuriente ken insigida met laeng a napasged kalpasan ti 10 nga oras.
