Inbatad ni Dr. Czarina Alcaraz, obstetrician-gynecologist (ob-gyn) ken consultant iti Mariano Marcos Memorial Hospital and Medical Center (MMMH&MC) iti siudad ti Batac a dagiti masikog a maibilang nga high risk iti covid-19 ti kangrunaan a dumalan iti RT-PCR test wenno swab test.
Segun ken ni Alcaraz, dagiti masikog a maibilang nga high risk ket addaan ti diabetes, highblood ken dadduma pay a medical conditions ken ti idadalan ti swab test ket mangrugi ti 37 weeks.
Innayun ni Alcaraz a dagiti mapan agpasngay iti nasao nga ospital manipod iti sabali a probinsya ket dumalan met iti swab test ken maipan iti isolation.
Mainaig iti daytoy, inpakaamo na nga adda ti nakasagana a covid-19 area iti ospital para kadagiti pasyente a positibo wenno suspect case nga agpasngay wenno dumalan iti operasyon.
Inbunnag na a sakbay a ma-admit wenno sumrek iti ospital dagiti pasyente ket nasken a dumalan iti triange ti ospital tapno maamoan nu low risk wenno high risk dagitoy iti covid-19.
Kabayatanna, kuna ni Alcaraz a ti magastos dagiti masikog a dumalan iti swab test ket ibaklay ti PhilHealth.
Nu pay kasta, kuna na a dagiti agkalikagum nga agpaswab test a saan nga high risk ket isuda ti mangbayad ti magastos.
Mainaig iti daytoy, inbaga ni Alcaraz a gapu iti umad-ado a kaso ti covid-19 ditoy probinsya ken addan ti tallo a masikog a nagpositibo iti sakit ket i-require ti MMMH&MC a dumalan iti swab test dagitoy.
