LAOAG CITY – Awan ti nairekord a panagruar ti pagilian ni Sen. Ronald “Bato” dela Rosa kadagiti international ports of entry ken exit ti Pilipinas basar iti Bureau of Immigration (BI).
Inbatad ni Bureau of Immigration spokesperson Dana Sandoval nga awan ti makitkitada a recent travel record ni Dela Rosa kadagiti international airport ken seaport iti pagilian.
Inlawlawag ni Sandoval a sakupen laeng ti Bureau of Immigration ti panagbantay kadagiti international ports kas kadagiti eropuerto ken seaport pakairamanan ti Zamboanga International Seaport.
Saan a karaman ditoy dagiti bay area a banbantayan ti lokal a gobierno, Philippine Coast Guard ken pulisia.
Immunan nga inrakurak ti Philippine National Police (PNP) a nagtalinaed pay laeng ditoy pagilian ni Dela Rosa kabayatan nga agsagsagana dagiti otoridad iti panangipatungpal ti arrest warrant manipud iti International Criminal Court (ICC).
Ni Dela Rosa ket manarimaan nga adda iti babaen ti Immigration Lookout Bulletin Order (ILBO) mainaig iti sangsangoen daytoy a warrant manipud iti International Criminal Court para iti kaso a crimes against humanity.
Basar iti International Criminal Court, ti senador ket maak-akusaran ti “indirect co-perpetrator” kadua ni dati a Presidente Rodrigo Duterte mainaig kadagiti maipagarup a pammapatay iti panawen ti ‘war on drugs campign’ manipud 2016 agingga 2018.
Kabayatanna, inpetteng ti kampo ni Dela Rosa nga iti baet a bigbigbigenda ti pannakaiparuk-at ti warrant, saanda daytoy a bigbigen ditoy Pilipinas.
Maipalagip a sumagmamano a bulan a saan a nagpakita iti Senado ni Dela Rosa kalpasan a rimmuar ti damag nga adda ti arrest warrant-na sakbay daytoy a nakita manen idi Mayo 11 tapno agbutos iti panagbalbaliw ti liderato iti Senado.
