LAOAG CITY – Kinontra ti Bureau of Immigration ti inbatad ti kampo ni Guo Hua Ping nga isuna ket Pilipino.
Daytoy ket kalpasan a nagparang ni Guo Hua Ping wenno alyas Alice Guo iti Bureau of Immigration hearing.
Segun kenni Atty. Gilbert Repizo, mangidadaulo ti Board of Special Inquiry ti Bureau of Immigration, adu ti indatag ti Special Prosecutor nga ebidensya a mangpaneknek a saan a Pilipino ni Guo Hua Ping ken inar-aramid na laeng dagiti dokumentona.
Karaman kadagiti intudo ni Atty. Repizo ti fingerprint nga iggem ti National Bureau of Investigation a mangipakita a maymaysa a tao da Guo Hua Ping ken Alice Guo.
Gapu iti daytoy, binilin ti Bureau of Immigration ti kampo ni Guo a mang-hire iti maysa nga eksperto tapno mapaneknekan dagiti rekord ti National Bureau of Investigation seknan iti fingerprint na.
Malaksid iti fingerprint, impakita pay ti Special Prosecutor ti birth certificate ni Guo a naaramid tapno agparang kas maysa a Pilipino.
