LAOAG CITY – Kinumpirmaran ti Bureau of Immigration (BI) a nakarwaren iti Pilipinas ni Mylah Roque, asawa ni dati a presidential spokesperson Harry Roque.
Inrakurak daytoy ni Bureau of Immigration spokesperson Dana Sandoval, kalpasan ti naiparuk-at nga arrest order manipod iti House Quad Committee kontra ken ni Mylah gapu iti namin-ado a daras a saanna a panagatendar iti panagdengngeg maipapan kadagiti krimen nga adda ti pakainaigan na iti Philippine Offshore Gaming Operators (POGO).
Kinumpirmaran ni Sandoval a Setyembre 3 paylaeng a nakaruwar iti pagilian ni Mylah.
Segun ken ni Sandoval, Setyembre 16 idi nangiparuk-at ti Immigration Lookout Bulletin Order (ILBO) kontra ken ni Mylah.
Ti Immigration Lookout Bulletin Order ket abiso kadagiti immigration officer a mapaalerto dagiti otoridad no rumuar iti pagilian ti maysa a tao a sakop iti nasao a pammilin.
Immunan nga inbatad ti Bureau of Immigration nga awan ti impormasyon no nakarwar metten iti pagilian ti asawa ni Mylah a ni dati a presidential spokesperson Harry Roque.
Iti baet daytoy, inpaganetget ni Fernandez a saan a malibasan dagiti agasawa a Roque ti sungsungbatan da iti linteg.
