LAOAG CITY – Nagballaag manen ni Bureau of Immigration (BI) Commissioner Norman Tansingco kadagiti agkalikagom nga agbalin nga overseas Filipino workers (OFWs) a saan nga agawat kadagiti maidiaya nga ilegal a trabaho iti aniaman a sites.
Inaramid daytoy ni Tansingco kalpasan a nakaawat ti report manipod iti immigration protection and border enforcement section (I-PROBES) ti Bureau of Immigration seknan iti maysa nga insidente iti Ninoy Aquino International Airport (NAIA) Terminal 3.
Basar iti Bureau of Immigration, maysa nga agtawen ti 27 a biktima ti nangibaga nga agturong koma idiay Taiwan kas turista.
Nupay kasta, naobserbaran dagiti naalerto nga opisyal ti imigrasyon a saan nga agpapada dagiti dokumento na ken in-refer da daytoy iti maikadwa nga inspeksyon.
Iti maikadwa nga inspeksyon, naamoan a ti maseknan ket agturong iti Albania iti Southern Europe no sadinno a na-recruit daytoy tapno agtrabaho iti maysa nga electric company.
Kagiddan iti daytoy, inadmitir ti biktima a naidiayaan ti escort services kasukat ti P120,000 no sadinno a naki-tinnawar agingga a naipababa iti P80,000, karaman ditoyen ti usaren na a flight tickets.
Apaman a nakadanun iti erupuerto, naam-ammo na ti inpagarop na nga escort na it maysa kadagiti food establishment ken pinagbayad na ti nayun a P67,000.
Nagpabigbig ti inpagarop na nga escort na kas maysa nga immigration employee, a nagkiddaw manen ti nayun a P10,000, ngem saan nan a binayadan pay.
Naamoan a ti kaso ti biktima ket dagus a naipila iti Inter-Agency Council Against Trafficking (IACAT) ken nagkari dagiti maseknan a pagsungbaten da dagiti recruiter na.
