LAOAG CITY – Nagballaag manen ti Bureau of Immigration iti publiko seknan iti panaglako kadagiti peke nga overseas employment certificates online.
Daytoy ket kalpasan ti pannakatiliw dagiti otoridad ti dua a Pilipino nga agturong koma iti sabali a pagilian ngem agpada a peke ti overseas employment certificate da a maipagarop a ginatang da iti online iti balor a P500 agingga iti P7,200.
Segun iti Bureau of Immigration, required a maaddaan ti Overseas employment certificate dagiti amin a Pilipino a rumuar iti pagilian tapno mapan agtrabaho iti abroad gapu ta daytoy ti agserbi nga exit clearance dagitoy.
Inpetteng ti ahensya a naiget nga ipawil ti linteg ti panaglako ken panaggatang kadagiti peke a dokumento para iti illegal a departure dagiti mangmangged nga agturong iti abroad gapu ta daytoy ti maibilang nga human trafficking.
Mainaig iti daytoy, inpaganetget ni Bureau of Internal Commissioner Norman Tansingco a naiget da a nakabantay kadagiti kastoy a kaso iti babaen ti inyuswat da a data-sharing agreement iti Department of Migrant Workers a mangipalubos kadagiti empleado da a mainspeksyon a dagus no lehitimo wenno saan dagiti sertipikasyon dagiti Overseas Filipino Workers a pumanaw iti pagilian.
