LAOAG CITY – Agdagup iti 260 a ribu a pisos ti kaudian a naipaay a tulong pinansial kadagiti umili ditoy probinsia nga adda ti pimmusay a kameng ti pamiliada a nagpatulong iti Provincial Government of Ilocos Norte iti babaen ti “burial assistance”.
Inlawlawag ti gobierno probinsial nga umabot iti 115 a ribu a pisos ti naipaay a tulong kadagiti pamilia dagiti pimmusay a kameng ti Metro Ilocos Norte Council.
Impalgakda a dua kadagitoy ti naipaayan ti saglilimapulo ribu a pisos kalpasan a ti pimmusay a kapamilia dagitoy a kameng ti Metro Ilocos Norte Council ket natay gapu ta nadesgrasya dagitoy kabayatan ti panagpaspasada idinto a tallo ti immawat ti saglilima ribu a pisos kalpasan a pimmusay ti kameng ti pamiliada gapu iti sakit.
Inbatad da nga umabot met iti duapulo ket lima dagiti umili a nagkiddaw ti tulong iti probinsia gapu iti ipupusay ti kameng ti pamiliada a saan a kameng ti Metro Ilocos Norte Council.
Kagiddan ti panangiyawat ti gobierno ti tulong kadagiti nadakamat nga umili ket inpadanonna metten ti pannakipagladingit ti sibubukel a gobierno probinsial kadagitoy.
Kabayatanna, inannugotda a bassit ti tulong pinansial a maipaay ti probinsia ngem no adda ti sabali a tulong a kalikaguman dagitoy a kiddawen nangnangruna no adda pakainaigan ti pamastrekan dagitoy ket mabalinda ti agkiddaw.
Innayon ti gobierno probinsial a dagiti mannalon, mangngalap wenno livestock raiser ket mabalinda ti agkiddaw iti kasapulanda iti Agri-Ka-Dito ken no addaan dagitoy ti bassit a negosio wenno sari-sari store ket mabalinda ti agkiddaw ti tulong iti Micro Small and Medium Enterprise Office wenno MSMEO.
