LAOAG CITY – Natay ti maysa kadagiti 12 a burias a naipasngay nga aglanglanga ken agtimek kas maysa a tao idiay Tanjay, Negros Oriental.
Basar iti bidyu nga in-post iti online ti akinkukua a ni Alfredo Cardenas Jr., naganak ti tarakenda a baboy idi Enero 21 ken maikawalo a rimmuar ti burias nga aglanglanga a tao ken boses daytoy.
Inbatadna nga apaman a rimmuar ti burias ket buteng ti immunada a narikna kalpasan a nakitada a rupa ti tao ken boses daytoy ngem saan a kumpleto dagiti paset ti rupana pakairamanan dagiti sakana ket arig ket bagi ti tao.
Naripar ni Cardenas nga arig ket agkakapsot ti burias ken saan daytoy a nagsuso iti inana a baboy agingga a natay daytoy kalpasan ti uppat nga oras ken intabonda iti likud ti pagtaenganda.
Kuna pay ni Cardenas, naminduan a darasen a naganak ti baboyda nga adda ti naidumduma a rupa ken pakpak.
Kabayatanna, saan met a mamati ti maysa a beterinario iti sayangguseng a nasikogan ti sabali nga ayup ti baboy no di ket posible a premature a naipasngay ti burias ken nabukel ti sumagmamano a paset ti bagina iti rupana.
