LAOAG CITY – Inrakurak ni Engr. Neil Jose, operations manager iti Florida bus company ditoy siudad ti Laoag a possible nga agsardeng ti panagpasada dagiti bus a mapan ken aggapu iti Metro Manila.
Daytoy ket kalpasan ti rakurak ni Presidente Rodrigo Duterte ti pannakaiparit a sumrek ken rumwar iti Metro Manila gapu ti coronavirus disease nga agapekto intono Marso 15 agpatingga intono Abril 14 ita a tawen.
Segun kenni Engr. Jose, bassit dagiti pasahero nga agturong iti Metro Manila gapu ti nasao a rakurak ken panagbuteng dagiti tattao a maakaran da ti virus.
Kuna na a possible a nangatngato met ti bilang dagiti agawid ditoy probinsya gapu ta saan da a kayat ti maakaran ti virus ken mapukpok iti Metro Manila.
Mainaig iti daytoy, inpatalged ni Engr. Jose ti kaadda ti maipaay nga ayuda kadagiti konduktor ken bus drivers no bilang maisardeng ti operasyon wenno ti panagbiyahe da.
Inlawlawag na a saan a kabalur ti masap-sapulan da iti panagbiyahe ti maited kadakuada a tulong iti panagsardeng ti operasyon da.
Kabayatanna, binalakadan ni Jose dagiti drivers ken konduktor ti panagsuot da ti facemask ken panagubbog ken agusar ti alchohol nga agbiyahe.
Daytoy ket tapno maliklikan iti pannakaapektar da ti coronavirus disease ken kas panagsakbay da.
Kuna na a mangipasuyot da pay ti disinfectant kadagiti uneg ti bus para ti proteksiyon dagiti pasahero.
Innayon ni Jose nga adda pay ti epekto na iti masapulan ti kompanya gapu ti coronavirus disease.
Saan da pay a nagkissay ti biyahe iti agdama.
