LAOAG CITY – Balligi ti naiyuswat a drug buy-bust operation babaen iti nagtitipon a pwersa ti PNP-Laoag, PDEA ken 101st Coy RMFB-1 kontra iti maysa a lalaki idiay Barangay 10 iti nasao a ciudad.
Nabigbig ti subject ti operasyon a ni Emer Martinez y Valdez, agtawen ti 38, naasawaan, bus driver, residente ti Barangay Caunayan iti ili ti Pagudpud ngem agnanaed idiay Barangay 10, Laoag City.
Nakumpiskar manipud iti ikot ti suspek ti maysa a transparent sachet a naglaon ti maipagarop a shabu nga agbalor ti sangaribo a pisos babaen ti panagpammarang ti pulis a posuer buyer.
Naala pay kenkuana ti maysa a transparent box a naglaon ti transparent plastic sachet nga addaan ti maipagarop a shabu; maysa a meduim plastic sachet a naglaon ti maatap shabu; maysa nga elongated transparent plastic sachet a naglaon ti shabu; maysa a wallet nga addaan ti kwarta ken dadduma pay a drug paraphernalia.
Kabayatanna, nagkedked nga agkomento ti suspek nga adda iti drug watchlist iti biang ti Street Level Target ti PNP.
Iti agdama, maisagsaganan ti maipila a kaso kontra iti nasao a suspek.
