LAOAG CITY – Balligi ti inyuswat dagiti kameng ti Philippine National Police (PNP) nga buy bust operation kontra iti maysa a driver ti bus ditoy ciudad ti Laoag.
Nabigbig daytoy a ni Ferdinand Mamuad Guerrero, agtawen ti 48, awanan ti asawa ken residente iti Brgy. 24, San Nicolas, Ilocos Norte.
Natiliw ni Mamuad babaen ti nagtitipon a pwersa ti PNP, Philippine Drug Enforcement Agency (PDEA) ken Philippine Drug Enforcement Unit (PDEU) iti mismo a sangwanan ti Fariñas bus shop no sadinno a naglako ti agbalor sangaribo a pisos iti nagpammarang a gumatang ti iligal a druga.
Nakumpiskar kenni Mamuad ti maysa nga pouch a nagmaris ti brown a naglaon ti tissue nga addaan ti uppat a pidaso ti maatap a shabu.
Kalpasan ti operasyon ket naiwayat pay ti drug search a nakaalaan ti dua a bassit a sachet a naglaon ti maipagarop a shabu, maysa a sachet ti naggawangan, drug paraphernalia, 450 a pisos, wallet ken motorsiklo.
Rumrumwar a ni Mamuad ket adda iti drug watch list wenno street level target ti PNP San Nicolas ken maysa a drug surrenderee.
Naamoan a naiwayat ti operasyon apaman a nakasangpet ditoy ciudad a naggapo idiay Manila.
