LAOAG CITY – Inpakaammo ni Bombo International News Correspondent Krystiel Marie Islao manipud idiay Russia a business as usual wenno normal laeng ti agdama a situasion iti pagilianda.
Daytoy ket kalpasan a simmangpet idiay Russia ni Syrian President Bashar al-Assad ken ti pamiliana gapu iti inaramid a panangagaw dagiti rebelde a grupo iti panangidaulona.
Segun kenkuana, awan dagiti agiwaywayat ti tignay protesta wenno aniaman a pasamak iti lugarda.
Inbatadna a limitado pay laeng ti maiparparuk-at nga impormasion kadagiti news agencies idiay Russia.
Kunana nga awan met ti pakdaar kadakuada manipud iti embahada ti Pilipinas idiay Russia maipanggep iti nasao a banag.
Maipalagip a ti Russia ket maysa a naiget a kaalyado ti Syria nga inikkanda ti asylum ni Assad.
Immuna iti daytoy, napasamak ti panaglibas kalpasan a rinaot ti Hay’at Tahrir al-Sham (HTS) ti nasao a gobiernona.
