LAOAG CITY – Maisayangkat iti kada malem ti biernes agingga iti malem ti domingo ita a bulan ti BuyIN ditoy ciudad ti Laoag.
Inbatad ni Mrs. Elma Gabriel, ti mangidadaulo ti Micro Small and Medium Enterprise Office wenno MSMEO iti gobierno probinsial a ti nasao nga aktibidad iti Sirib Mile ket paset ti pannakidanggay da iti pannakarambak ti maika-205 nga anibersario ti Ilocos Norte ken ti Pamulinawen Festival ditoy ciudad ti Laoag.
Inbatadna a mangrugi ti nasao nga aktibidad iti alas kuatro ti malem ken agpatingga iti alas nuebe ti rabii.
Mangnamnama ni Gabriel a kalpasan ita a bolan ket addanto pay ti sabali a lugar a pakaisayangkatan daytoy.
Nupay kasta, imbatadna a no napintas ti panagannayas ti panaglako dagiti Micro Small and Medium Enterprises ken mannalon iti agdama a paglaklakoan da ket mabalin a saanen a maiyakar pay ti lokasyon na.
