LAOAG CITY – Iti baet ti panagbalinna a kataengan a player iti National Basketball Association (NBA), naminsan manen nga insalakan ni Lebron James ti koponan manipud iti sabali koma manen a pannakaabak.
Iti laban ti Los Angeles Lakers ken Indiana Pacers, naaramid ti Lakers a lippasen ti three-game lossing streak ken inabakda ti Pacers iti babaen ti 2-point buzzer beater ni Lebron.
Immuna a kinamat ti Pacers ti 13 points a deficit iti maudi a kuarter ken 42 sec. sakbay a nalpas ti laban ket iggem daytoyen ti 1-point lead iti iskor a 119 – 118.
Sakbay a nalpas ti maudi a segundo, ginandat ni Lakers guard Luka Doncic a mangiserrek ti maysa a floater ngem timmama laeng daytoy iti rim.
Saan met daytoy a pinalabes ni Lebron ken kinamatna ti bola nga agsubli iti basket. Naan-anay met a naguni ti buzzer kagiddan ti panagserrek ti bola iti ring ken inbulsa ti Lakers ti 1-point win iti iskor a 120 – 119.
Daytoyen ti maikatlo nga ay-ayam ni Lebron sipod idi nagsubli isuna iti hardcourt kagiddan ti sinagabana a minor injury.
