LAOAG CITY – Inrakurak ti Civil Aviation Authority of the Philippines (CAAP) nga addan iti babaen ti heightened alert dagiti amin nga eropuerto ditoy pagilian kagiddan ti manamnama a panagdudupudop dagiti pasahero para iti Undas 2025.
Basar iti Civil Aviation Authority of the Philippines, mapattapatta a 5.8 milyon a pasahero ti tumayab manipud Oktubre agingga iti Nobiembre, nangatngato ngem maysa a milyon maidasig iti 4.8 milyon a pasahero a nairekord idi 2024.
Inbatad ti ahensia a maaddaan ti Malasakit Help Desks iti tunggal eropuerto, naiget a seguridad ken naka-standby a medical teams para kadagiti emergency.
Nakibinnulig ti Civil Aviation Authority of the Philippines iti Philippine National Police Aviation Security Unit, Office for Transportation Security, Department of Tourism, Civil Aeronautics Board ken dagiti airline tapno masigurado ti naurnos nga operasion ti eropuerto.
Inabisoan ti Civil Aviation Authority of the Philippines dagiti pasahero a sumurot kadagiti pagannurotan iti eropuerto tapno maliklikan ti pannakaitantan ken istorbo kadagiti dadduma a biahero.
Ti nasao nga addang ket kagiddan ti Oplan Biyaheng Ayos: Undas 2025 ti Department of Transportation nga agpaut manipud inton Oktubre 30 agingga iti Nobiembre 4, 2025.
