LAOAG CITY – Inpakaammo ni General Manager Royina Marzan Garma ti Phil. Charity Sweepstakes Office wenno PCSO a mabalin ti Ilocos Norte a gundawayan ti “calamity assistance program” ti ahensia.
Segun kenkuana, adda ti sangapulo ket uppat nga ili ditoy probinsia a nakipinnirma ti Memorandum of Understanding iti PCSO a suportaranda dagiti paay-ayamda ken iti kanito nga adda ti sumangbay a kalamidad ket mabalinda a maala ti tulong nga ipaay ti ahensia.
Nupay kasta, saanen a dinakamat ni Garma dagiti ili a karaman iti nasao a katulagan.
Mainaig iti daytoy, imbatadna a nupay adda ti nailatang a pundo nga ipaay ti PCSO para iti kalamidad ket dagiti laeng LGU a nakipinnirma ti POU iti ahensia ti mabalin a manggundaway iti daytoy.
Iti baet daytoy, saanen a nailawlawag pay ni Garma no addan dagiti LGU ditoy probinsia a nakaala ti “calamity assistance” manipud iti PCSO.
