LAOAG CITY – Natiliw iti drug buy-bust operation dagiti dua nga agpagayam iti asideg ti Marcos Stadium iti paset ti Barangay 5 ditoy ciudad ti Laoag.
Nabigbig dagitoy a da Ben Louie Macaganda y Baloloy, agtawen ti 29, call center agent, taga Barangay Saguigi iti ili ti Pagudpud, ken ni Marvin Coloma y Tanielas, agtawen ti 29, residente iti Brgy. San Lorenzo iti ili ti Bangui ken dati a drug surenderee.
Dagus a kinemmeg dagiti otoridad dagiti suspek kalpasan a naglako da ti maysa a sachet a naglaon ti maipagarop a shabu nga agbalor ti sangaribo a pisos.
Iti panangkapkap dagiti otoridad kadagiti dua ket nakakumpiskar da pay ti uppat a dadakkel a sachet a naglaon ti maipagarop a shabu.
Inadmitir ni Macaganda iti Bombo Radyo Laoag a nagus-usar ti droga ngem saanna a nasungbatan no kaano ti naudi a panagusar na.
Naglikudan met ni Coloma a kukua da dagiti naala nga ebidensya dagiti otoridad ngem saanna a naibaga no ania ti ar-aramiden da iti nasao a lugar.
