LAOAG CITY – Inlawlawag ni Mr. John Teodoro, General Manager ti Prime Water a saan pay a karaman ti Camella Homes iti Brgy. Zamboanga ditoy siudad ti Laoag kadagiti ipapaayanda ti serbisio babaen ti Ilocos Norte Water District ken Prime Water.
Daytoy ket kalpasan nga adda ti naawat a reklamo ti Bombo Radyo Laoag a sumagmamano nga homeowner iti nasao subdivision ti agrekreklamo gapu ta kanayon nga awan ti danumda.
Segun ken ni Teodoro, adda ti kiddawda iti maseknan a subdivision nga isuda ti agserbi iti serbisio ti danumda ngem saan pay a naiplastar a naimbag ti Memorandum of Agreement wenno MOA a nagbaetan iti opisinada.
Inbatadna a kalikagumda a mai-turn over pay laeng nga umuna kadakuada ti update plan tapno maisimpa dagiti masapol a requirements sakbay a maipatungpal ti serbisioda.
Inlawlawagna nga adda ti bukud a sistema ti nadakamat a subdivision nga isu ti pangal-alaanda ti danumda.
Kabayatanna, inpakaammo ni Teodoro nga addan ti nasurok maysa a tawen ti napalabas sipod nagsurat dagiti maseknan nga homeowner ti subdivision no sadinno inpatulodna daytoy iti Central Office ti Prime Water ken nakikoordinar metten iti Central Office ti Camella Homes.
