LAOAG CITY – Inbatad ni House Prosecutor ken Manila 3rd district Rep. Joel Chua, nasayaat no palubosan dagiti media camera iti uneg ti Senate Impeachment Court bayat ti pannakabista ni Bise Presidente Sara Duterte tapno ad-adda a maparang-ay ti kinalawag.
Linagip pay ni Chua a bayat ti impeachment trial da dati a Presidente Joseph Estrada ken dati a Chief Justice Renato Corona, napalubosan dagiti kamera manipud kadagiti news organizations iti uneg ti korte.
Iti agdama, saan a mapalubosan dagiti kamera manipud kadagiti network ti telebision ken dadduma pay nga organisasion ti damdamag iti uneg ti impeachment court, isu nga agpannurayda laeng iti opisial a video feed ti Senado.
Inpetteng pay ni Chua a rumbeng laeng a mapalubosan dagiti media nga agaramid iti trabahoda gapu ta napateg a makita ti publiko ti intero a pannakausig ti impeachment ken saan laeng a no ania ti ma-capture ti opisial a kamera ti Senado.
Segun ken ni Chua, mabalin nga ipatungpal ti impeachment court dagiti nainget a pagannurotan tapno masigurado a saan nga apektaran dagiti media camera ti impeachment proceedings.
