LAOAG CITY – Inpakaammo ni Mr. Jhey-ar Mangati ti Health Education ken Promotions Officer ti Mariano Marcos Memorial Hospital and Medical Center iti Siudad ti Batac a napagbalin ti Catalino Acosta Memorial Elementary School wenno CAMES kas temporario a Field Hospital.
Inlawlawag na a gapu iti agtultuloy a panagngato manen ti kaso ti COVID-19 ditoy probinsia ket napagsasaritaan ti Provincial Government of Ilocos Norte, DepEd Schools Division Office of Batac City ken ti nadakamat nga ospital nga aramiden ti CAMES kas temporario a Field Hospital 3.
Inbatadna a dagus a naikkan kadagiti beddings, desk fans, tugaw, lamisaan ken dadduma pay a ramit a mausar dagiti pasiente pakairamanan ti panangiyestablisarda ti nurse station iti nasao a pagadalan.
Segun ken ni Mangati, ti Field Hospital 3 ket isu ti mangakomodar kadagiti stable non-COVID-19 patients tapno manayunan ti bilang dagiti bed occupancy a pangikabilan dagiti naapektaran ti makapatay a virus nangruna ket saanen a maigawid ti panagadu dagiti COVID-19 patients a matamtaming iti nasao nga ospital.
Mainaig iti daytoy, inbatad ni Dr. Maria Lourdes Otayza ti Medical Center Chief II ti ospital, maibasar iti kaudian a datos ti Gobierno Probinsial ket kadagupan iti 170 a COVID-19 bed capacity ket 59 laengen a COVID-19 beds ti nabati idinto nga umaboten iti 65 a porsiento ti bed occupancy rate.
Gapu iti daytoy, kunana a kasapulan a maiyakar dagiti stable a non COVID-19 patients iti nasao a pagadalan tapno adda ti pakaikabilan dagiti COVID-19 patients.
Iti agdama, adda ti pakabuklan a 88 a naka-admit a pasiente ti ospital no sadino ket 25 ditoy ket maibilang a suspect cases idinto nga adda ti maysa a probable case.
Malaksid iti daytoy, naammoan nga adda ti 85 nga health care workers ti ospital a naka-isolate iti agdama.
