LAOAG CITY – Mairaman a maikkat intono Marso 28 dagiti campaign posters dagiti national candidates a nakaipegket kadagiti maipawil wenno saan nga otorisado a lugar.
Daytoy ti inbatad ni Atty. Julius Balbas, ti mangidadaulo iti Commission on Election ditoy ciudad ti Laoag.
Kunana nga iti agdama ket adda dagiti campaign materials dagiti national candidates nga adda kadagiti maipawil a lugar ditoy ciudad a makitkita da.
Inlawlawag na a saan da a masagid dagitoy gapo ta ti concern da laeng ket dagiti local candidates ngem babaen ti nationwide baklas ket maipaayan da ti hurisdiksiyon nga iraman dagiti posters dagiti national candidates.
Immunan nga inpetteng ti Commission on Election ditoy ciudad a kagiddan ti panangrugi ti local campaign period intono Marso 28 ket iwayat met ti ahensya ti operation baklas.
