LAOAG CITY – Inrakurak ti Canada ti counter-tariffs nga umabot iti 50% para iti agarop 28-billion Canadian dollars a balor dagiti produkto manipod iti Estados Unidos kas panangsubbot da kadagiti baro a buwis nga inpataw ni US President Donald Trump.
Segun ken ni Finance Minister François-Philippe Champagne, agbalin nga epektibo dagiti nasao a buwis intono Setyembre 8 kadagiti produkto a kas ti landok, muebles, ken dagiti arwaten tapno maprotehiran dagiti mangmangged ken negosyo iti pagilian da.
Namonganay ti susik iti nagbaetan ti dua a pagilian kalpasan a bimmagsak dagiti negosasyon iti trade iti nagbaetan ti Estados Unidos ken Canada no sadinno a nagsinnukat ti akusasyon ti agsumabngir a partido mainaig kadagiti saan a nainkalintegan a kiddaw.
Pinatgan met ti gobierno ti Canada ti panangilatang ti C$7.5 bilyon a tulong para kadagiti domestic industries tapno maliklikan ti nalawa a pannakapukaw ti trabaho kabayatan ti agtultuloy a tension iti trade.
