LAOAG CITY – Inimbitaran ni Canadian Prime Minister Justin Trudeau ni Presidente Ferdinand Marcos Jr. a mapan bumisita idiay Canada iti sumaruno a tawen para iti selebrasyon ti 75th diplomatic relations iti nagbaetan ti dua nga estado.
Inbatad ni Presidential Communications Office (PCO) a naidanun ti imbitasyon ken ni Presidente Marcos iti naiyuswat a bilateral meeting a pakairamanan ni Trudeau iti sidelines ti 43rd ASEAN Summit and Related Summits idiay Indonesia.
Iti nasao a taripnong, napagsaritaan dagiti state leaders ti Filipino-Canadian diaspora ken ti panangaw-awag ni Trudeau kas “incredible ties” ti dua a pagilyan.
Pakaragsakan ni Presidente Marcos ti maiyuswat a selebrasyon iti kultura dagiti Filipino idiay Canada.
Dinakamat pay ni Presidente Marcos iti nasao a taripnong a ti Canada ket maysa kadagiti maibilang kas “most desired destinations” para kadagiti mangmangged a pilipino.
Gapu iti daytoy, inbatad ni Presidente Marcos ket positibo mainaig iti Philippine-Canada ties gapu ta awan ti makita na nga aniaman a lapped iti agtultuloy ken umun-uneg a relasyon ti dua a pagilyan.
Kabayatanna, inpakaammo ni Presidente Marcos a ti iyaakar ti Canada iti Asia-Pacific ken Indo-Pacific ket “significant” ken mangipakita laeng no ania nga ekonomiya ti dumurdur-as.
Maipalagip a daytoyen ti maikatlo a bilateral meeting iti nagbaetan da Marcos ken Trudeau sipud nagtugaw a presidente iti Pilipinas iti napalabas a tawen.
