LAOAG CITY – Pormalen a nalukatan ti Capitolympics babaen ken ni Gov. Matthew Marcos Manotoc.
Daytoy ket kalpasan ti panagparada iti sangoanan ti kapitolio probinsial dagiti empleado ti Provincial Government of Ilocos Norte a nabingbingay iti walo a cluster.
Maibilang ditoy ti Cluster 1 wenno ti Healthcare and Medical Hospitals, Cluster 2-Gov Admin & Resources Management, Cluster 3-Legislative and Governance, Cluster 4-Finance and Revenue, Cluster 5-Plan & Development, Cluster 6-Agriculture & Environment, Cluster 7-Social Services & Welfare ken ti Cluster 8-Community & Public Services.
Kageddan daytoy, naiyammo dagiti muses iti kada Cluster nga ad-adda a nangparagsak kadagiti empleado pakairamanan dagiti opisial ti probinsia.
Kabayatanna, ti Capitolympics ket panawen para iti panagaam-ammo a naimbag dagiti empleado, panag-ehersisio, panagpaling-et ken kangrunaanna ti pannakaiyestablisar ti napintas a panagpapagayam.
Inpadanonna pay ti panangnamnamana ti kaawan ti ma-injured ken ginutigotna ti tunggal maysa nga agpacheck-up tapno masigurado nga awan ti parikut iti salun-at dagitoy ket maiyannatupda iti ania man a pagay-ayamanda.
Naammoan a mangrugi iti masungad a lawas dagiti “ball games” kas iti volleyball ken basketball ken manamnama nga agngudo ti Capitolympics inton Disiembre 13.
