LAOAG CITY – Nagun-od ti Overall Champion ti Cordillera Administrative Region no sadinno nga inabakna ti National Capital Region nga adda iti maikadua a puesto iti Kyorugi Taekwondo.
Mainaig iti daytoy, segun kadagiti gold medalist manipud iti Cordillera Administrative Region nga isuda Aithan Raphael Ogoy, Jun Adrian Wagtingan ken Chris Levi Culallad a saan a nagbalin a nalaka ti nagdalananda a training ground gapu ta nabara ti panawen.
Inyestoria ti maysa kadakuada a Grade 4 pupil pay laeng idi nangrugi isuna a nagay-ayam ti taekwondo idinto a dagiti dua ket agpada a ginutigot isuda dagiti kabsatda.
Agpapada a saanda a ninamnama ti nagbalin a resulta gapu ta ibilangda a narigat ken nalalaing dagiti nakabinnalubalda nga atleta.
Kabayatanna, inpakaammo ni Mr. Arnold Oglayon, Coach ti Taekwondo ti Cordillera Administrative Region nga addan ti lima a daras a nagbalinda nga Overall Champion.
Innayonna a ti kangrunaan a kasapulan dagiti atleta ket disiplina iti bagida nangruna iti panangsurot iti time management.
