LAOAG CITY – Kinumpirmaran ni Dr. Loida Valenzuela, ti provincial veterinarian nga addan ti lima nga ili ditoy probinsya ti apektado ti African Swine Fever (ASF).
Dagitoy ket ti Solsona, Dingras, Marcos, Nueva Era ken ti Carasi.
Segun kenni Valenzuela, dua a blood sample manipud kadagiti baboy iti ili ti Nueva Era ti nagpositibo iti ASF rason a mapapatay ken maikali ti nasurok 100 a taraken a baboy.
Iti met ili ti Carasi, agarop 200 a baboy ti maikali kalpasan a ti 12 a blood samples a naala ket positibo iti ASF.
Kuna ni Valenzuela a ti ar-aramiden da iti agdama ket duktalen da no anya ti rason iti panagwaras ti ASF no sadinno nga iti Carasi ken Nueva Era ket maipagarop nga adda ti naiserrek a karne ti baboy manipud iti sabali nga ili.
Mainaig iti daytoy, kunana nga iti ili ti Solsona ket nanayunan pay dagiti barangay nga apektado iti ASF kalpasan a positibo iti nadakamat a sakit ti maysa a baboy iti Barangay Talugtog.
Immapela met ti doktor kadagiti agtartaraken nga ipudno dagitoy ti sitwasyon dagiti baboy tapno maliklikan ti ad-adda a panagwaras ti ASF.
