LAOAG CITY – Kinumpirmaran ni Police Chief Master Sgt. Ruel Silvestre iti PNP Pasuquin a pimmusay ti maysa a lalaki gapu ti pannakaatake na iti uneg ti pagtaengan da iti Brgy. Pobalcion 3, iti ili ti Pasuquin.
Daytoy ket kalpasan a nabirokan ti agruprupsa a bangkay na babaen ti kayong na a ni Eden Asibo a residente iti nasao a lugar.
Segun kenni Silvestre, awan ti nakita da a foul play a makagapu iti ipususay ti biktima malaksid iti pannakaatake na.
Inlawlawag na a nadlaw ti ipag ti biktima a saan a rumrumwar daytoy idi kalman agingga nga inuray da a sumipnget ken manilaw iti pagtaengan na.
Kaskasdi a saan a nagsilaw ti family house a paggigiyanan ti biktima rason a tinurong da ken nakita da a ngumisngisit ti bangkay ti biktima a nakadasay.
Naamuan ti PNP manipud iti Rural Health Unit a nangeksamen ti bangkay a tallo nga aldawen a pimmusay.
Kuna ni Silvestre a kumbinsido ti pamilya a pimmusay ni Jerry June Asibo gapu iti pannakatake na ken saanen a maipadalan iti otopsiya.
Innayon na a nadlaw pay dagiti kabagyan na a kimmutong ti biktima ken saan a nagpacheck-up iti doktor ken agmaymaysa nga agbibiag.
