LAOAG CITY – LAOAG CITY – Napili a baro a santo papa ket ni Cardinal Robert Prevost, agtawen ti 69, ken isuna ti kaunaan nga American pope iti pakasaritaan ti Simbaan Katolika.
Maawagan daytoy kas Pope Leo XIV nga isuna ti maika-267 a Santo Papa.
Naipasngay ni Pope Leo idiay Chicago, Illinois, United States, nga isu met ti nangrugian ti karera na babaen ti panagserbi na para kadagiti Augustinians.
Nagserbi isuna idiay Peru manipod 1985 agingga iti 1986 ken manipod 1988 agingga iti 1998 kas parish pastor, diocesan official, seminary teacher ken administrator.
Nagbalin daytoy a cardinal idi 2023 ken nagserbi kas prefect of the Dicastery for Bishops ken presidente ti Pontifical Commission for Latin America sipud iti dayta metlaeng a tawen.
Immunan a nagserbi ni Pope Leo kas Bishop of Chiclayo idiay Peru manipod 2015 agingga iti 2023, ken nagbalin a general iti Order of Saint Augustine manipod 2001 agingga iti 2013.
Idi Nobyembre 3, 2014, dinutukan ni Pope Francis ni Prevost kas apostolic administrator ti Diocese of Chiclayo ken titular bishop ti Sufar. Inawat na ti episcopal consecration na idi Disyembre 12, 2014, iti St. Mary’s Cathedral idiay Chiclayo, ken idi Setyembre 26, 2015 ket napagbalin kas bishop of Chiclayo.
Idi Pebrero 6, 2025, inpromote ni Pope Francis ni Prevost iti cardinal-bishop, ken in-assign na daytoy iti Suburbicarian Diocese of Albano iti Province of Rome.
Ni Prevost ket kabaelan na ti agsarita iti lenggwahe nga English, Spanish, Italian, French, ken Portuguese, ken kabaelan na pay ti agbasa iti Latin ken German.
