LAOAG CITY – Naarestar ti maysa a caretaker ti pagtaraknan kadagiti manok kalpasan a naalaan ti maipagarup a sumagmamano nga iligal a droga, paltog ken balbala babaen ti Anti-Illegal Drug Buy-bust Operation iti Barangay Poblacion iti ili ti Nueva Era.
Nabigbig ti suspek a ni Jumar Cortez, agtawen ti 42, agpapaay pay kas caretaker ti maysa a telecommunications company ken residente iti nasao met laeng a barangay.
Nakumpiskar dagiti otoridad kabayatan ti panagkapkapda iti suspek ti wallet nga adda dagiti sumagmamano nga heat sealed transparent plastic sachet a naglaon ti maatap a shabu.
Malaksid iti daytoy, naala pay manipud iti suspek ti sling bag nga adda met dagiti sumagmamano nga heat sealed transparent plastic sachet a naglaon ti mapapati a shabu, maipagarup a maysa a calibre 38 a paltog ken balbala ken dadduma pay a drug paraphernalia.
Segun ken ni Cortez, manarimaan ti panangikondisionna kadagiti sumagmamano a manok a para iti pallot gapu ta makilaban daytoy idiay Magsingal, Ilocos Sur inton Lunes.
Nupay kasta, kellaat nga adda ti nagsardeng a dua a lugan iti kalsada no sadinno nga adda ti dua nga indibidual ti bimmaba ken nagsaludsod dagitoy kenkuana no aglaklako isuna ti manok.
Inbatadna a saanda nga ilaklako dagiti manok ken adda idiay Canada ti akinkukua kadagitoy.
Inlawlawagna a pinapakkleb isuna dagiti maseknan nga indibidual ken saan daytoy a limmaban kadakuada gapu ta mamati nga awan ti dakes nga aramidna.
Inpettengna a dagiti naala a maipagarup a kontrabando ket inpabulsada laeng kenkuana.
Kunana a tallo a tawenen daytoy nga agbanbantay iti pagtaraknan kadagiti manok.
Innayonna nga immunan a natiliw daytoy gapu met laeng iti iligal a droga ngem nakaruar iti pagbaludan babaen ti plea bargaining.
Kabayatanna, inpakaammo ni Jeorge Cortez, ama ti suspek nga awan ti ammona maipanggep iti nasapamak a pannakaarestar ti anakna.
