LAOAG CITY – Manamnama a makasango ni Double Olympic Gold Medalist Carlos Yulo ken dadduma pay a Filipino Olympians ni Presidente Ferdinand Marcos Jr. iti Malacañang inton Martes, Agosto 13, 2024.
Sumangpet ti grupo ni Yulo inton Martes ti malem iti Villamor Air Base no sadinno a saraboen isuda dagiti bukudda a pamilia.
Basar iti Presidential Communications Office, maikkan ti heroes parade dagiti atleta a mangrugi iti Philippine International Convention Center idiay Pasay City no sadinno dumalyasatda iti lugar idiay Manila ken malpas iti Malakanyang.
Apaman a makasangpet iti Malacanang, saraboen da Presidente Marcos, First Lady Liza Araneta Marcos ken First Family dagiti atleta no sadinno maipaayanda ti pammadayaw ken insentibo para iti kontribusionda iti Philippine Sports ken nagbalin a performance iti 2024 Paris Olympics.
