LAOAG CITY – Napadayawan ti Gymnast sensation a ni Carlos Yulo a nakaaramid ti pakasaritaan iti panagballigina ti kaunaan a double gold medal ti Pilipinas iti Paris Olympics.
Naipaayan ti pammadayaw ni Yulo kas ‘Athlete of the Year’ ti Philippine Sportswriters Association (SMC-PSA) ita nga aldaw, Enero 27, 2025.
Naiyuswat ti event idiay Manila no sadinno a selebraran dagiti balligi ti pagilian iti Olympics ken dadduma pay nga atleta a nangaramid ti pakasaritaan idi 2024.
Karaman iti Philippine Sportswriters Association Hall of Fame ni Hidilyn Diaz a four-time winner ti ‘Athlete of the Year’ idi tawen 2016, 2018, 2021 ken 2022 para iti tay-ak ti weightlifting.
Naipaayan ti President’s Award dagiti boxer nga isuda Nesthy Petecio ken Aira Villegas para iti bronze medals-da iti Paris Games.
Naikkan pay ti pammigbig da Philippine Olympic Committee (POC) President Abraham ‘Bambol’ Tolentino kas Executive of the Year ken ti Gymnastics Association of the Philippines ket nabigbig kas National Sports Association (NSA) of the Year.
Naammoan nga adda ti 117 nga awardees pakairamanan dagiti dadduma pay nga atleta manipud kadagiti nagduduma nga sports ti naikkan ti pammadayaw iti Philippine Sportswriters Association awards.
