LAOAG CITY – Inpaay ni Engr. Maria Teresa Bacnat, provincial agriculturist ti Ilocos Norte ti kapanunutan na seknan kadagiti maar-aramid iti maysa nga assosasyon dagiti mannalon.
Daytoy ket mainaig ti addang a 500 a pisos ti awaten ti mannalon nga adda iti listaan ti RSBSA idinto ti 4,500 a pisos ket maukkon ken daytoy ti mapagbibingayan dagiti aminen a miembro ti maysa nga assosasyon agraman dagiti awan iti listaan ti RSBSA.
Saan a nadakamat ni Bacnat a maipawil daytoy ngem ketdi addaan ti napagnunumuan dagiti miembro ti assosasyon, iti gagem a makatulong da kadagiti sabali a mannalon nga awan iti listaan ti RSBSA.
Kuna na a napintas a gagem daytoy ken saan kuma a daytoy ti pagririryan, nangruna ket dakkel a gatad ti masapul iti panagtalon.
Inbatad ni Engr. Bacnat a no mangparnuay laeng ti riri ti nasao nga addang dagiti maseknan ket saan laengen nga iyuswat daytoy.
Mainaig iti daytoy, pagsaludsudan pay ni Engr. Bacnat ni Laoag City Agriculturist Engr. Sheila Opelac no adda dagiti kakastoy a mapaspasamak kadagiti mannalon.
Maiyuswat ti pannakaibunong ti tulong pinansyal kadagiti agarup 2,000 a mannalon ditoy siudad ti Laoag intono bigat, Agosto 4, 2022.
