LAOAG CITY – Inrakurak ti Bangko Sentral ng Pilipinas ti panagngato ti cash remittance dagiti Pilipino ti agingga iti 2.8% manipud idi Enero agingga idi Abril.
Basar iti Bangko Sentral ng Pilipinas, dumanon iti $10.782 billion ti nairekord daytoy iti remittance idi Abril idinto a dumanon laeng iti $2.485 billion ti nairekord idi Abril iti napalabas a tawen.
Namonitor ti ahensia ti panagngato iti income transfers ti agpada a land-based ken sea-based Overseas Filipino Workers.
Para kadagiti land-based overseas Filipinos, dumanon iti $8.53 billion ti nairekordda a remittance idinto a dumanon laeng iti $8.27 ti nairekordda idi 2023. Daytoy ket nangatngato ti 3.2%.
Idinto a dagiti sea-based workers ket naaramid a maka-transfer ti $2.25 billion, nangatngato ti 1.5% maidasig iti $2.22 billion iti napalabas a tawen.
Kabayatanna, nakitaan met ti panagngato iti ‘personal remittance’ dagiti overseas Filipinos iti kapada a period no sadino dimmanon daytoy iti $12.010 billion. Daytoy ket nangatngato ti 2.8% maidasig iti $11.677 billion iti napalabas a tawen.
Maibasar iti Bangko Sentral ng Pilipinas, dagiti remittance a naggapu iti Saudi Arabia ken Singapore ket addaan ti kadakkelan a kontribusion iti nairekord a panagngato ti remittance.
Iti pakabuklan ti 2024, namnamaen ti Bangko Sentral ng Pilipinas a ngumato ti pakabuklan a cash remittance dagiti Overseas Filipino Workers ti agingga 3% maidasig iti cash remittance iti napalabas a tawen.
