LAOAG CITY – Kinumpirmaran ti Department of Health nga adda ti panangato ti kaso ti kamuras idiay Metro Manila ken kadagiti nagduduma a lugar iti pagilian.
Gapu iti daytoy, mangisaysayangkat ti Department of Health ti catch up immunization ken double time iti panagbakuna kontra iti kamuras nangruna para kadagiti ubbing.
Kabinnulig ti local government units ken pribado a sektor, naisayangkat ti catch up immunization iti paset ti Binondo, Manila.
Target a bakunaan kontra iti kamuras dagiti ubbing a siam a bulan agingga iti 59 a bulan wenno lima a tawen ken agpababa.
Iti report ti Regional Epidemiology and Surveillance Unit, adda ti 368 ti nairekord a kaso manipud idi Enero agingga iti Marso iti agdama a tawen.
Inbatad ni Director for Department of Health Metro Manila Center for Health Department Dr. Lester Tan, adda ti nairekord a panagngato ti kaso ngem addan iti lokal a gobierno no mangideklarar ti outbreak gapu ta karebbenganda daytoy.
Maaddaan ti Phase 1 ken Phase 2 iti panagbakuna ti Department of Health kontra iti kamuras.
Nangrugin ti Department of Health iti phase 1 idi Marso 17 nga agpaut nga agingga ita nga aldaw ti Biernes, Marso 28.
Iti agdama, adda ti 40 a ribu ti nabakunaandan.
Posible a maiyuswat ti phase 2 ti panagbakuna iti maikadua a kuarter ti tawen.
Basar iti eksperto, highly transmissible ti sakit a kamuras isu a nasken a makontrol ti nasao a klase a makapatay a sakit.
