LAOAG CITY – Ginutigot ti Catholic Bishops’ Conference of the Philippines (CBCP) ti publiko a makipagpaset iti pnangkondenar da iti kurapsyon babaen iti panagtitipon a maiyuswat iti EDSA People Power Monument intono bigat Setyembre 21, kas paset iti “Trillion Peso March.”
Gagem iti panagtitipon iti pananggutigot met iti gobierno nga agpalawag mainaig iti maipagrop a trilyon nga anomalya iti flood control projects iti napalabas a 15 a tawen.
Manamnama nga agatendar iti rinibo nga indibidual manipud kadagiti nagduduma a sektor pakairamanan ti simbaan, agtutubo kasta metten iti civil society groups.
Adda ti maiyuswat a misa iti EDSA Shrine sakbay ti panag-martsa da kas pannakipagpaset da iti kararag ken panawagan para iti hustisya.
Napili ti Setyembre 21 kas pananglagip iti deklarasyon ti Martial Law ken palagipan ti publiko iti kinapateg ti panagsungbat dagiti responsable.
Kageddan iti daytoy, mangiyuswat pay ti prayer rally dagiti dioceses kadagiti probinsya tapno makikaysa iti gagem da iti panagtitipon da.
Nagpanawagan pay dagiti obispo kadagiti amin a Pilipino a makipagpaset iti nakapya a rally para iti kinapudno ken panagbalbaliw.
