LAOAG CITY – Inlawlawag ti Catholic Bishops’ Conference of the Philippines (CBCP) a maikontra kadagiti agwarwaras nga ispekulasyon, awan ti maibilang kas “top contender” iti biang dagiti cardinals a makipaset iti conclave tapno agpili ti baro a Santo papa kalpasan a pimmusay ni Pope Francis.
Segun ken ni Catholic Bishops’ Conference of the Philippines spokesperson Fr. Jerome Secillano, siasinno man kadagiti 135 a cardinal electors ti mabalin a maelektaran basta makaala da ti 2/3 a botos.
Inbatad na nga iti general congregation dagiti kardinal, in-inot da a maestablisar no sinno ti rebbeng da nga ibotos nga awan ti panagkampanya wenno public frontrunner.
Tallo a Filipino cardinal ti karaman kadagiti mabalin nga agbotos, dagitoy ket isuda Cardinal Luis Antonio Tagle, Manila Archbishop Jose Cardinal Advincula, ken Caloocan Bishop Pablo Virgilio Cardinal David.
Kuna pay ni Cardinal David nga uray nalatak ti maysa a cardinal, mabalin paylaeng a pilyen ti Espiritu Santo kas baro a Santo papa, kas ti napasamak idi ken ni Pope Francis.
Kalpasan a naitabon ni Pope Francis, rugyan paylaeng ti “Novemdiales,” wenno siyam nga aldaw a panagladingit sakbay a marugyan ti secretive conclave iti Sistine Chapel no sadinno nga adda ti rumuar a puraw nga asok no addan ti mapili a baro a Santo Papa, idinto a nangisit no apay pay ti napili.
Maipalagip a pimmusay ni Pope Francis idi Abril 21 gapu iti stroke ken naitabon idi sabado, Abril 26 a tinabunoan ti agarop 400 a ribo a tattao pakairamanan dagiti naruay a world leaders ken dignitaries.
