LAOAG CITY – Inpetteng ni Leah Marie Baoit, asawa ni Barangay Kagawad Lucky Paul Baoit iti Barangay Sto. Niño iti ili ti Nueva Era nga idi napasamak ti pammaltog iti Barangay 4-Marcos iti ili ti Banna ket kadwa na daytoy.
Ummuna iti daytoy, naitudo ni Kagawad Baoit nga isu ti pimmaltog ken ni Jamerson Agamata a puon ti nakatayan ti biktima.
Segun kenni Mrs. Baoit, idi naggapo ti asawa na iti ili ti Badoc a napan nagtrabaho ken idi nakapasweldon ket nagawid iti balay da.
Kunana a kalpasan daytoy ket napan da iti maysa a tianggi kadwa da pay ti anak da tapno ken gimmatan da ti feeds a kanen ti baboy da.
Inbatad na nga agarop pito a minutos ti kabayag da iti nasao a tianggi gapo ta adda pay dagiti kinasarsarita ti asawa na iti nasao a lugar.
Inlawlawag na na nga idi naggapo da iti tianggi ket napan nagpakan ti baboy ti Kagawad Baoit ken kalpasan ket nagbuya ti telebisyon agingga iti alas-dyes ti rabii.
Mainaig iti daytoy, kunana nga iti kabigatan na, Nobyembre 21 ket adda dagiti kameng ti PNP-Banna a napan iti pagtaengan da ken inimbitaran da ti kagawad gapo ta adda laeng ti ilawlawag na iti istasyon da.
Kunana a boluntaryo a simmurot ni Kagawad Baoit gapo ta awan met ti ammo na a basol na ngem nakigtot da laengen isi isuna ti maitudo a pimmaltog kenni Agamata.
Innayon na a saan nga am-ammo ni Kagawad Baoit ti biktima ken inpetteng na a nasingpet ti asawa na nangruna ket awan dagiti karirriri na iti lugar da.
Kinumpirmaran ni Chona Balisacan, agtagikua ti tianggi a naggatangan da Baoit ti feeds nga idi napasamak ti pammaltog ket adda isuna iti lugar da.
Nakasagana met a mangipakita iti CCTV ti tianggi na ken mangipaneknek a saan a ni Kagawad Baoit ti suspek iti nasao a pammaltog.
Kabayatanna, maragsakan ni Baoit a nakarwaren iti pagbalodan iti PNP-Banna kalpasan a nabalod gapo ta naitudo daytoy a suspek iti pammaltog.
Segun kenni Baoiat, awan ti ammo na a rason no apay nga isuna ti naitudo a pimmaltog kenni Jamerson Agamata a nakatayan ti biktima.
Inlawlawag na nga idi adda dan iti istasyon ti pulisya kalpasan a naimbitaran ket ditoy nga inbaga dagiti pulis nga isuna ti maitudtudo a suspek iti nasao a pammaltog.
Inbatad na a naamoan na nga isuna ti intudo ti maibilang a witness a pimmatay kenni Agamata.
Kunana nga idi napan dagiti pulis iti pagtaengan da ket adda ti nakita na a nakalugan iti patrol a nakaabungot ken isu ti nangitudo kenkuana.
Kinumpirmaran na nga inbaga kenkuana ni Police Captain Norman Pentang, hepe ti PNP-Banna a ti kaso a naipila kontra kenkuana ket addan iti piskalya.
Mainaig iti daytoy, kuna ni Baoit a nakigtot laengen idi adda ti kabsat ti biktima ken ipetpetteng na nga isuna ti suspek ken damdamagen ti maseknan no mano da a nagaramid.
Saan met a maibaga ni Baoit no napalubusan wenno simrek lattan ti kabsat ti biktima ken immasideg kenkuana.
Immapela met ni Baoit a maimbestigar kuma a nasayaat ti napasamak a krimen tapno mapaneknekan no siasinno ti pudno a suspek ken saan kuma a mairamraman isuna gapo ta ammo na nga awan ti aramid na, kageddan ti pannakapagladingit na iti pamilya ti biktima.
Kabayatanna, nagkedked ni Police Captain Pentang a mangipaay ti ad-ado a komento seknan iti daytoy ngem inbaga na laeng nga agdependen ton iti piskalya ti desisyon iti daytoy.
