LAOAG CITY – Manamnama a mairuar inton Setyembre 18 ti kopya ti CCTV footage ti maysa a kameng ti construction firm a karaman iti kontrobersiya kadagiti flood control projects idi napan iti Senado idi Agosto 19.
Daytoy ket adda ti pakainagan na iti alegasyon ni dati a Bulacan assistant district engineer Brice Hernandez a maysa nga agnagan ti “Mina” nga empleado ti WJ Construction Company ti napan nangipan ti “obligasyon” iti maysa nga staff ti senador.
Segun kenni Sen. Ping Lacson, gagem ti panangiruar ti CCTV footage a maamuan no sadinno nga opisina ti Senado ti napanan ni “Mina”.
Mapaayaban met ti maseknan tapno maamuan no siasinno ti binisita na iti Senado ken no anya ti rason na.
Ummunan nga inbutaktak ni Hernandez a maipagarop a nangiyawat ti WJ Construction ti “obligasyon” kenni Beng Ramos, a rumrumuar a kadua ni Senador Jinggoy Estrada.
Naiget met a naglikudan ni Estrada nga adda ti tao na nga agnagan ti Beng Ramos ken kunana nga awan ti ammo na maipanggep iti aniaman a korapsyon kadagiti flood control projects.
Kabayatanna, kuna ni Lacson a paayaban da met ti mangop-opera iti CCTV iti Senado tapno agbalin a pormal iti testimonya mainaig iti ala ti camera.
