LAOAG CITY – Inlawlawag ni Sannguniang Panlungsod Member Jayson Perera ti plano a pannakaamyendar ti CCTV ordinance ditoy siudad ti Laoag.
Segun ken ni Perera, kalikagum na nga ad-adda a maprotektaran dagiti umili rason nga adda dagiti kayat na a mainayun a masapol a maaddaan ti CCTV.
Inbatad na a malaksid kadagiti pasdek negosyo ket masapol a maimuntar ti CCCTVs kadagiti pagadalan para iti proteksyon dagiti agad-adal.
Inpakaammo na a karaman pay ditoy dagiti pagtagilakoan nga aglaklako ti arak gapu ta kaaduan kadagitoy ket saan laeng nga aglaklako ngem agpapainom pay iti nasanger nga isu met ti kangrunaan a pamunganayan ti gulo.
Mainaig iti daytoy, kuna ni Perera nga amin a bus nga agop-operar ditoy siudad ket masapol a maaddaan ti dash cam.
Inbatad ni Perera a babaen kadagiti nasao nga addang ket mamoniot dagiti mapaspasamak ti aglawlawag nangruna nu adda ti krimen wenno nagduduma nga insidente.
Kabayatanna, inpakaammo ni Perera nga adda ti maiyuswat a public hearing intuno Nobiembre 4 tapno mangngegan ti ideya dagiti maseknan nga stakeholders sakbay a maaprubaran ti odinansa.
Kuna na a daytoy ket mangrugi iti alas dos ti malem ken iti City Auditorium ditoy siudad.
