LAOAG CITY – Inpasigurado ni Doctor Melvin Manuel, ti mangidadaulo iti City Disaster Risk Reduction and Management Council a natalged ti carnivalan kangrunaan na dagiti rides wenno pagluganan bayat ti panagfiesta ditoy ciudad ti Laoag.
Inpakaammo na nga addan ti papanda panaginspeksyon iti lugar kadwa da ti Bureau of Fire Protection ken ti Engineering Office.
Kuna ni Manuel nga ininspeksyon da a naimbag dagiti pagluganan tapno masigurado a a natalged dagitoy kangrunaan na ket ubbing ti kaadoan a mapan aglugan.
Inpakaammo pay ni Doctor Manuel nga adda ti intuding da nga standard kadagiti pagluganan no sadinno a no ubbing ti aglugan ket masapol a saan unay a napaspas tapno masigurado a natalged dagitoy ken saan da a maulaw.
Nupay kasta, inbatad ni Manuel nga adda dagiti saan a mabalin a pagluganan dagiti ubbing kas iti bangka nga agpangato ken agpababa gapu ta para laeng daytoy kadagiti nataengan wenno adda ti nakemna.
Inpanamnama ni Manuel a bayat ti panagfiesta wenno selebrasyon ti Pamulinawen Festival ditoy ciudad ti Laoag ket inaldaw da kadagiti kameng ti Engineering Department, Bureau of Fire Protection ken iti Philippine National Police a mapan agbantay ken aginspeksyon iti carnivalan ken dagiti pagluganan tapno maipasigurado a natalged dagiti tattao a mapan iti lugar.
