LAOAG CITY – Inrakurak ni Dr. Melvin Manuel, ti mangidadaulo iti City Disaster Risk Reduction and Management Council a naiget ti koordinasyon da kadagiti amin a maseknan nga ahensya ti gobierno tapno masigurado ti seguridad ken kinatalged ti publiko ita nga Undas.
Karaman ditoy ti Philippine National Police, Bureau of Fire Protection, City Health Office, Philippine Coastguard, City Disaster Risk Reduction and Management Council ken dagiti pay opisyal ti barangay ken barangay tanud.
Inbatad na nga amin a kamponsato ditoy ciudad ti Laoag ket nawarasan kadagiti ambulansya tapno adda ti dagus a mausar no kasapulan.
Kuna na a naiget ti pammilin da nga agingga nga adda ti tao kadagiti kamposanto ditoy ciudad ket masapol a saan a pumanaw dagiti otoridad a napusgan nga agbantay.
Innayon ni Dr. Manuel a mainspeksyon amin nga itugot dagiti tattao nga agturong iti kamposanto ken no adda dagiti maipawil a banag a makita dagiti otoridad ket kumpiskaren da a dagus kas ti patadem ken dadduma pay.
