LAOAG CITY – Naiget ti koordinasyon ti City Disaster Risk Reduction and Management Council kadagiti nagduduma a barangay ditoy ciudad ti Laoag kabayatan ti iduduprak ti bagyo Marce.
Daytoy ti inbatad ni Dr. Melvin Manuel, ti mangidadaulo iti City Disaster Risk Reduction and Management Council ditoy ciudad.
Segun ken ni Manuel, adda ti group chat da kadagiti amin a barangay ditoy ciudad tapno alisto da a maidanun kadakuada dagiti kasapulan da a tulong.
Mainaig iti daytoy, kuna ni Manuel a naiget ti panagmonitor da kadagiti coastal barangay kangrunaan na iti Barangay Gabu.
Innayon ni Manuel nga iti naipatungpal a preemptive evacuation ditoy ciudad ti Laoag ket addan ti 364 nga indibidual ti naibawit manipod iti nagduduma a barangay ditoy ciudad.
