LAOAG CITY – Kalikagum ti City Disaster Risk Reduction and Management Office a mapadur-as wenno aglebel-up ti incident command system ditoy ciudad ti Laoag.
Daytoy ti inpakaammo ni Dr. Melvin Manuel, ti mangidadaulo iti nasao nga opisina.
Kunana a daytoy ti addang tapno makompleto ti incident management team ditoy ciudad ti Laoag.
Inbatad na a kasapulan nga aglebel-up ti incident system system 1, 2, 3, ken 4, ken no malpas daytoy ket maibilang ton kas incident management team.
Inlawlawag ni Manuel a ti Incident Management Team ket mabalin nga agresponde iti sabali a lugar iti rehion wenno pagilian nga agkasapulan ti nayun a tulong no adda dagiti kalamidad.
Innayon na a ti Incident Management Team bukbuklen ti incident commander, command ken general staff, ken dadduma a personnel a naidesignar iti sabali pay a posisyon.
Kabayatanna, kuna ni Manuel a ditoy probinsia ket maymaysa paylaeng ti addaan ti Incident Management Team, daytoy ket iti ili ti Dingras.
