LAOAG CITY – Agtultuloy iti pannakikoordinar ti City Disaster Risk Reduction and Management Office ken dadduma pay a rescue teams kadagiti nagduduma a munisipalidad ken probinsia iti panagbirok iti mapukpukaw a menor de edad iti Barangay Calayab ditoy ciudad ti Laoag.
Segun ni Dr. Melvin Manuel, mangidadaulo ti City Disaster Risk Reduction and Management Office ditoy ciudad ti Laoag a saan da met nga agsarsardeng a mangbirbirok iti mapukpukaw a menor de edad isut gapuna na a nakikordinarda kadagiti amin a posibilidad kas iti pannakikoordinar da kadagiti amin a probinsia .
Immuna iti daytoy, nangiwayat da iti search and retrieval operations nga pakairamanan ti air, water and land ngem negatibo pay laeng ti resulta na.
Maipalagip a nagpakada ti menor de edad a napan nagbisbisikleta kaduana dagiti papagayamna ken idi nakadanonda iti lugar ket napan timmapog ti biktima iti baybay ngem saanen a timmakdang.
Kabayatanna, nagpanawagan ni Manuel iti publiko ano adda ti makita iti kabaybayan ket dagus da nga ipakaammo kadagiti otoridad.
