LAOAG CITY – Mangestablisar ti City Disaster Risk Reduction and Management Office ditoy siudad ti Laoag ti medical and security stations kagiddan ti Semana Santa.
Segun ken ni Dr. Melvin Manuel, mangidadaulo ti City Disaster Risk Reduction and Management Office, maestablisar dagitoy kadagiti simbaan, coastal areas ken resort.
Inbatadna a naiget ti pannakikoordinarda iti Philippine National Police, Philippine Coast Guard, Bureau of Fire Protection, Department of Public Safety ken City Health Office.
Malaksid iti daytoy, kuna ni Manuel a kabinnuligda pay dagiti opisial ti barangay a dakkel a tulong para kadakuada.
Inlawlawagna a masapul nga agbalin nga aktibo dagiti life guard kadagiti kabaybayan wenno pagdidigusan tapno maliklikan nga adda ti malmes.
Innayonna a dagiti dimmalan iti panagsanay mainaig iti water search and rescue ket mai-deploy kadagiti kangrunaan a pagturungan dagiti local ken foreign tourist tapno maipasigurado ti kinatalged dagitoy.
